Jaqtime.kz Тамыз айының әрбір екінші жексенбісінде еліміз бойынша ауыр да жауапты, бірақ абыройлы мамандық иелерінің төл мерекесі – Құрылысшылар күні жоғары деңгейде аталып өтеді.
Осы бір айтулы кәсіби мерекеге орай Жаңақорған ауданындағы «Руханият» орталығында салтанатты жағдайда «Ел игілігін еселеген құрылысшылар» деп аталатын тағылымды әрі ауқымды мерекелік іс-шара болып өтті. Жергілікті құрылыс саласының өркендеуіне аянбай үлес қосып жүрген мамандар мен ардагерлер бас қосқан бұл шараға аудан әкімі Ғалымжан Жарқынбек арнайы қатысып, ел дамуының өзегіне айналған сала өкілдеріне өзінің ыстық ықыласы мен ақ тілегін білдірді.
Салтанатты жиынның шымылдығын ашқан аудан басшысы өз сөзінде бұл саланың аймақ экономикасында алатын айрықша орнына жеке тоқталып, ауданды көркейтудегі ардагерлер мен қатардағы мамандардың өлшеусіз еңбегін ерекше атап өтті. Өңірдің өркендеп, заман талабына сай түлеуіне қосып жүрген сүбелі де салмақты үлестері үшін барша құрылысшылар қауымына өзінің шексіз ризашылығын білдірген аудан әкімі өз сөзін былайша сабақтады:
«Құрылыс – кез келген өңірдің даму қарқынын, тыныс-тіршілігін айқындайтын ең маңызды да негізгі салалардың бірі. Елдің жарқын ертеңі мен тұрғындардың жайлы тұрмысы үшін бой көтерген әрбір еңселі ғимарат, әрбір тұрғын үй мен әлеуметтік нысан – құрылысшылардың адал еңбегінің, маңдай терінің және жоғары кәсіби шеберлігінің нақты жемісі. Сондықтан да құрылысшы мамандығы әрдайым қоғамда зор құрметке, айрықша қошеметке лайық. Бүгінгі таңда Мемлекет басшысының тікелей тапсырмалары мен Үкіметтің жан-жақты қолдауының арқасында Сыр өңірі үлкен әрі ауқымды құрылыс алаңына айналып отыр десек қателеспейміз. Бұл оң өзгерістер біздің Жаңақорған ауданымызда да өз жалғасын тауып, инфрақұрылымдық және құрылыс жұмыстары жүйелі түрде, жоғары қарқынмен жүзеге асырылуда. Осындай маңызды да стратегиялық жобалардың барлығында Сіздердің төккен маңдай терлеріңіз бен кәсіби еңбектеріңіздің айқын ізі жатыр. Осы мерейлі де салтанатты мереке қарсаңында ауданымыздың өсіп-өркендеуіне және құрылыс саласының серпінді дамуына қосқан қомақты үлестеріңіз үшін баршаңызға шынайы алғысымды білдіремін. Баршаңызға зор денсаулық, отбасыларыңызға амандық пен береке, жауапты еңбектеріңізге толағай табыстар тілеймін!»
Шындығында да, Жаңақорған ауданында соңғы жылдары құрылыс саласында қол жеткізілген жетістіктер мен оң көрсеткіштер көңіл қуантады. Статистикалық мәліметтерге сүйенсек, биылғы жылдың бірінші жартыжылдығының қорытындысы бойынша атқарылған құрылыс жұмыстарының көлемі өткен жылдың сәйкес кезеңімен салыстырғанда 170 пайызға өсіп, рекордтық көрсеткішке жеткен.
Мұнымен қоса, халықты тұрғын үймен қамтамасыз ету бағытында да қарқынды жұмыстар жүргізіліп, 36 мыңнан астам шаршы метр тұрғын үй пайдалануға берілді. Бұл – аудан тұрғындарының баспаналы болу арманын жүзеге асырған үлкен көрсеткіш.
Егер кейінгі төрт жыл көлеміндегі ауқымды істерге көз жүгіртсек, ауданда жалпы құны 21,8 миллиард теңгені құрайтын 20 әлеуметтік нысанның құрылысы толығымен аяқталып, бүгінде ел игілігіне қызмет етуде. Сонымен бірге әлеуметтік саладағы құрылыс қарқыны да жыл өткен сайын артып, өзіндік оң серпін танытып келеді. Мәселен, соңғы үш жыл ішінде 3,6 миллиард теңге көлеміндегі қомақты қаржыға әлеуметтік жағынан осал топтарға, көпбалалы және аз қамтылған отбасыларға арналған 254 пәтер бой көтеріп, салтанатты түрде тұрғындарға табысталған еді. Ал ағымдағы жылы бұл игі бастамалар одан әрі жалғасын тауып, 4 пәтерлі 50 жаңа тұрғын үйдің құрылыс жұмыстары қарқынды түрде жүргізілуде.
Салтанатты іс-шара ары қарай саланың дамуына өлшеусіз үлес қосқан еңбек озаттары мен үздік өкілдерін арнайы құрметтеу, марапаттау рәсімімен жалғасты. Марапаттау барысында Қазақстан Республикасы Өнеркәсіп және құрылыс министрлігінің Құрмет грамотасымен саланың көпті көрген ардагерлері Ерсінбай Қабылбаев пен Ербол Сарсенов марапатталса, осы министрліктің Алғыс хатына «ДДА» жауапкершілігі шектеулі серіктестігінің директоры Данияр Досантаев пен аудандық сәулет, қала құрылысы және құрылыс бөлімінің сектор меңгерушісі Шыңғыс Маханұлы лайық деп танылды.
Бұдан өзге, ауданның әлеуметтік-экономикалық дамуына, инфрақұрылымының жақсаруына қосқан елеулі әрі үлгілі үлестері үшін бірқатар білікті сала мамандарына Қызылорда облысының Құрмет грамотасы, сондай-ақ облыс және аудан әкімдерінің, салалық басқармалардың Алғыс хаттары салтанатты түрде табысталды. Сондай-ақ бірқатар азаматтарға ерекше құрмет белгісі ретінде «Жаңақорған ауданының дамуына қосқан үлесі үшін» медалі тағылды.
Ел игілігін еселеп, туған өңірдің ажарын кіргізіп жүрген құрылысшыларға арналған бұл кеш мерекелік көңіл-күйге ұласты. Аудандық мәдиниет үйінің өнерпаздары дайындаған арнайы концерттік бағдарлама мен әуезді әндер салтанатты жиынның көркін ашып, қатысушыларға ерекше рух пен көтеріңкі көңіл-күй сыйлады.
