Jaqtime.kzЕлімізде экологиялық таза көліктерді тану мен олардың қозғалысын реттеу мақсатында электромобильдерге арнайы мемлекеттік нөмірлер беру жоспарланып отыр.

Парламент Сенаты цифрландыруды дамыту, жеке деректер қауіпсіздігін қамтамасыз ету және көлік саласына жаңа технологияларды енгізуді көздейтін заң жобасын бірінші оқылымда қабылдады. Алдын ала мәліметтерге сәйкес, бұл жаңа мемлекеттік нөмірлердің түсі жасыл болуы мүмкін.

Ішкі істер министрінің орынбасары Санжар Әділовтің мәлімдеуінше, электромобильдерге арналған арнайы нөмір белгілерін дайындау үшін мемлекеттік бюджеттен қосымша қаражат талап етілмейді, себебі өзгеріс тек нөмірдің түсіне ғана қатысты болмақ. Жаңа жүйе ағымдағы жылдың жазында ресми түрде қабылданғанымен, көлік иелері бұл нөмірлерді бірден ала алмайды.

Себебі заң аясында жүйенің кедергісіз іске қосылуын қамтамасыз ету үшін алты айлық өтпелі кезең енгізу ұсынылып отыр. Бұдан бөлек, мақұлданған заң жобасы тек электромобильдерді ғана емес, сонымен қатар заманауи көлік инфрақұрылымының өзге де өзекті мәселелерін реттейді.

Атап айтқанда, құжатта жүргізушісіз басқарылатын (автономды) көліктердің қозғалыс тәртібін айқындау, сондай-ақ электросамокаттар мен шағын электрлі көлік құралдарының жалпы жол қозғалысына шығуына қатысты арнайы шектеулер енгізу шаралары қарастырылған.