Jaqtime.kz Жаңақорған ауданына қарасты Төменарық ауылдық округінде өңірдегі бұқаралық спортты дамыту, салауатты өмір салтын насихаттау және жастарды отансүйгіштікке тәрбиелеу бағытындағы игі іс-шаралар өз жалғасын табуда. Осы орайда ауылда қазақтың спорт сүйер қауымының жадында сақталған, атына лайық істер атқарған ардақты азамат Қылышбаев Асқар Рысбайұлын еске алуға арналған шағын футболдан дәстүрлі аудандық ашық турнир өтті.

Тартысты да тартымды сипатта өрбіген бұл спорттық додаға аудан мен өңірдің түкпір-түкпірінен жиналған 16 команда қатысып, өздерінің бақтары мен баптарын сарапқа салды. Жасыл алаңға шыққан әрбір ұжым жеңіске деген табандылық пен жоғары дайындықтарын көрсетіп қана қоймай, спорт арқылы өзара достық пен ынтымақтастық рухын тереңдете түсті. Ойын барысында көрсетілген тартысты сәттер мен шабуылдар жиылған жанкүйерлерге ерекше көтеріңкі көңіл-күй сыйлап, нағыз спорт мерекесіне ұласты.

Тартыс пен шеберлік таластырған бәсекенің қорытындысы бойынша, төрешілер алқасының әділ бағалауымен жүлделі орындар мен жеңімпаздар ресми түрде анықталды. Атап айтқанда, жарыстың бас жүлдесі мен 1-орынды Жаңақорған кентінің «Ернұр» командасы қанжығасына байлап, 200 000 теңге көлеміндегі қаржылай сыйақымен марапатталды. Ал жүйелі түрде ұйымдасқан ойын өрнегін көрсеткен «Бірлік» командасы 2-орынды еншілеп, 100 000 теңгеге ие болды. Тартысты матчтардың нәтижесінде «Жаңақорған» командасы 3-орынды қанағат тұтып, 70 000 теңге қаржылай сыйақыға қол жеткізсе, төртінші орынға лайық деп танылған «Қожакент» командасына 20 000 теңге табысталды.

Сонымен қатар, турнир барысында алаңда ерекше көзге түсіп, өз командасының жеңіске жетуіне айтарлықтай үлес қосқан және жоғары ойын өрнегін көрсеткен 5 үздік ойыншыға ынталандыру ретінде арнайы 10 000 теңгеден қаржылай сыйақылар беріліп, барлық қатысушылар мен жүлдегерлер ресми түрде құрметке бөленді.