Jaqtime.kz Сыр өңірінің әлеуметтік-экономикалық даму қарқыны соңғы жылдары соны серпін алып, тұрғындардың тұрмыс сапасын арттыруға бағытталған ауқымды бастамалар дәйекті түрде жүзеге асырылып келеді. Осы оң өзгерістердің кезекті тармағы ретінде Жаңақорған кентіндегі «МАИ бекеті» шағын ауданында заманауи су тарату станциясы мен қосылу тармағы салтанатты түрде пайдалануға берілді. Жергілікті жұртшылық көптен күткен бұл қуанышты сәтке облыс әкімі Мұрат Ергешбаев арнайы қатысып, жаңақорғандықтардың игілігіне айналған инфрақұрылымдық нысанның ашылуымен құттықтады.
Аймақ басшысы өз сөзінде бұл жобаның жүзеге асуы Мемлекет басшысының тікелей тапсырмасы және Бас прокуратураның үйлестіруімен мемлекетке қайтарылған активтер есебінен мүмкін болғанын атап өтті.
Атап айтқанда, 2025-2026 жылдары осы заңсыз активтерді қайтару қорынан облысқа 45 миллиард теңге қаржы бөлініп, жалпы саны 31 стратегиялық жоба іске асырылған болатын. Соның ішінде Жаңақорғандағы су тарату станциясының құрылысына 1,1 миллиард теңге бағытталып, барлық жұмыстар жоғары сапа деңгейінде толық аяқталды. Тіршілік нәрімен қамтамасыз ететін бұл нысан ендігі жерде 1 500-ге жуық тұрғын үйді таза әрі сапалы ауызсумен үздіксіз қамтамасыз етуге толық мүмкіндік беріп отыр. Аймақ басшысы Сыр жұртшылығының атынан елдегі әлеуметтік теңсіздікті жоюға және өңірлердің инфрақұрылымын нығайтуға қолдау білдірген Президентке, сондай-ақ заңдылықтың сақталуын қадағалаған Бас прокуратураға шынайы алғысын жеткізді.
Салтанатты жиында өңірдегі әділдік пен дамудың сабақтастығын тілге тиек еткен облыс прокуроры Ризабек Ожаров пен Жаңақорған кенті ардагерлер кеңесінің төрағасы Серхожа Ыдырысов сөз сөйлеп, жасалып жатқан қамқорлықтың мән-маңызын жоғары бағалады.
Шара барысында ауданның әлеуметтік-экономикалық өркендеуіне өз үлесін қосып, стратегиялық нысанды белгіленген мерзімде әрі сапалы етіп салып шыққан мердігер мекеме өкілдері мен құрылысшыларға облыс әкімінің Алғыс хаттары табысталды. Бұл оқиға — аймақта соңғы төрт жылда қолға алынған жүйелі реформалар мен мемлекеттік қолдаудың нақты нәтижесі. Осы кезең ішінде Президент пен Үкіметтің ерекше назарының арқасында облыс бюджеті екі есеге артып, рекордтық 809 миллиард теңгеге жетті, ал өңірдің даму бюджеті 4,3 есеге өсіп, бұрын-соңды болмаған көрсеткішті тіркеді.
Бөлінген ауқымды қаржы, ең алдымен, аймақтағы жылдар бойы кордаланып қалған түйткілді мәселелерді шешуге, жол, тұрғын үй, газдандыру және ауызсу жүйелерін жаңғыртуға бағытталуда. Осы жүйелі жұмыстардың нәтижесінде бүгінде облыс тұрғындары 100 пайыз орталықтандырылған сапалы ауызсумен қамтылып, өңір бойынша маңызды әлеуметтік көрсеткішке қол жеткізілді. Газдандыру бағытында да серпінді қадамдар жасалып, жыл соңына дейін тағы 10 елді мекенге көгілдір отын жеткізіліп, жалпы қамту деңгейін 85 пайызға жеткізу жоспарланып отыр.
Мұнымен қоса, тұрғындарды баспанамен қамтамасыз ету мәселесі де басты назарда тұр: жақын арада үй кезегінде тұрған 6 200-ден астам отбасыға жаңа пәтерлердің кілті табысталмақ. Өңірдің көлік-логистикалық әлеуетін арттыру мақсатында облыс бойынша 141 шақырым автомобиль жолдары, ішкі көшелер мен көпір өткелдері күрделі жөндеуден өтіп жатыр, бұл сапалы әрі жақсы жағдайдағы жолдардың үлесін 95,5 пайызға дейін жеткізуге мүмкіндік береді. Осылайша, мемлекетке қайтарылған активтер мен тиімді жоспарланған бюджет қаражаты қарапайым халықтың тұрмыс-тіршілігін жақсартуға, аймақтың өркендеуіне берік негіз қалап отыр.
