Jaqtime.kz Ішкі істер министрлігі елімізде жүріп жатқан «Қарасора – 2026» жедел-профилактикалық іс-шарасының аралық қорытындысын жариялады. Еліміздің оңтүстік өңірлері мен көлемі 60 мың гектардан асатын Шу алқабы есірткі құрамдас өсімдіктерді өсіруге қолайлы аймақ болғандықтан, бұл аумақтарға баса назар аударылып отыр, — деп хабарлайды Polisia.kz.

Қылмыстың жолын кесу үшін биыл заманауи технологиялар – ғарыштық мониторинг, авиация және арнайы ұшу аппараттары белсенді қолданылуда. Қабылданған кешенді шаралардың нәтижесінде операцияның алғашқы үш айында айтарлықтай нәтижелерге қол жеткізілді:

• 2 мыңнан астам есірткі құқық бұзушылығы тіркеліп, олардың жолы кесілді;

• 4 ұйымдасқан қылмыстық топтың заңсыз әрекеті тоқтатылды;

•  21 тонна есірткі тәркіленді;

• Өсімдіктерді заңсыз өсірудің 256 фактісі анықталып, ондаған плантация жойылды;

• Жасанды жағдайда есірткі өсіруге арналған 25 фитозертхананың жұмысы әшкереленді.

Құқық қорғау органдары есірткінің заңсыз айналымына қарсы бағытталған «Қарасора – 2026» іс-шарасы әлі де жалғасып жатқанын және бұл бағыттағы жұмыстар қатаң бақылауда екенін мәлімдеді.