Jaqtime.kz Қызылорда облысы Жаңақорған ауданында алдағы күз-қыс мезгіліне, яғни жылу беру маусымына дайындық жұмыстары қарқынды жүргізілуде. Осы бағытта атқарылып жатқан шаруалардың барысын пысықтау және олқылықтардың алдын алу мақсатында аудан әкімі Жарқынбек Ғалымжан Жаңақорған кентіндегі бірқатар әлеуметтік маңызы бар нысандарды арнайы аралап шықты.
Аудан басшысының жұмыс сапары ең алдымен аумақты көмірмен қамтамасыз етуші негізгі оператор – «BEST» ЖШС-нің қатты отын қорымен танысудан басталды. Қазіргі таңда аталмыш кәсіпорынның қоймасына 1,1 мың тонна көмір жеткізіліп қойған. Алдағы күндері келетін суық маусымда аудан тұрғындарының отынға деген қажеттілігін толық өтеу үшін барлығы 10 мың тонна көмір қажет екені есептелген. Бүгінгі таңда көмір операторы бекітілген арнайы кестеге сәйкес қатты отын қорын толықтыру және қоймаға жеткізу жұмыстарын уақытылы жүргізіп жатыр.
Халықты әлеуметтік маңызы бар отын түрімен уақтылы әрі қолжетімді бағада қамтамасыз ету мәселесі әкімнің ерекше бақылауында болды. Осыған орай, аудан басшысы жауапты аудандық тұрғын үй-коммуналдық шаруашылығы және автомобиль жолдары бөлімінің басшысы Нұржан Сүлейменовке бірқатар нақты тапсырмалар жүктеді. Атап айтқанда, тұрғындарға көмір бағасын алдын ала ашық түрде жариялауды, сондай-ақ халыққа сатылатын қатты отынның белгіленген бағадан негізсіз қымбаттап кетуіне немесе алыпсатарлыққа жол бермеуді қатаң тапсырды.
Көмір қоймасын аралағаннан кейін аудан әкімінің жұмыс сапары әлеуметтік сала нысандарын тексерумен жалғасты. Атап айтқанда, аудандық аурухананың алдағы жылыту маусымына дайындық деңгейі жан-жақты тексеріліп, мекеменің жылу жүйелерінің техникалық әзірлігі мен қазіргі уақытта жүргізіліп жатқан жұмыстардың сапасы жіті қаралды. Денсаулық сақтау ұйымының қыс мезгілінде үздіксіз жұмыс істеуі басты назарда екені атап өтілді.
Сонымен қатар, аудандағы білім беру нысандарының дайындығы да назардан тыс қалмады. Атап айтқанда, 125 білім беру ошағының алдағы жылу беру маусымына дайындық барысы толық пысықталып, мектептер мен балабақшалардың жылу жүйелерінің жай-күйі қаралды.
Нысандарды аралау қорытындысы бойынша аудан басшысы жауапты сала басшылары мен мекеме жетекшілеріне жылыту маусымына дайындық жұмыстарын белгіленген мерзімде, сапалы түрде толық аяқтауды міндеттеді. Сонымен қатар, қыс мезгілі басталғанда барлық әлеуметтік нысандардың жылу жүйелерінің тұрақты әрі үздіксіз жұмыс істеуін қамтамасыз етуді қатаң тапсырды.
