Еңбек көрігі қызған Сыр бойында күз мезгілі – шын мәніндегі толайым еңбек пен маңдай тердің қайтарымы берілетін ең жауапты кезең. Өңірдегі астықты өлкеде диқандар жиын-терін науқанын қыздырып, алқаптан мол өнім жинауға ерекше қарқынмен кірісіп кетті. Әсіресе, берекелі Қожакент ауылдық округінде осы бір маңызды науқан талапқа сай, жоғары ұйымшылдықпен жүргізіліп жатыр. Дала төсіндегі қыз-қыз қайнаған жұмыс пен астық орағының барысын бақылау мақсатында аудан әкімі Жарқынбек Ғалымжан Қожакент ауылындағы «Арай» шаруа қожалығының егістік алқабында арнайы болып, шаруалардың тынымсыз тірлігімен жақыннан танысты. Аудан басшысы даладағы ауыр да жауапты еңбек басында жүрген еңбеккерлермен жүздесіп, техникалардың дайындығын, орақ пен бастыру жұмыстарының қарқынын саралап, диқандарға сәттілік тіледі.
Мұндай қолдау мен жігерлендіру дала еңбеккерлерінің еңсесін көтеріп, жауапкершілігін артыра түсетіні сөзсіз. Мәселен, биыл аудан бойынша барлығы 38 232 гектарға ауыл шаруашылығы дақылдары себілсе, соның ішіндегі негізгі де басты дақыл саналатын күріш егістігі 6 756 гектарды құрап отыр. Қаз-қатар тізілген комбайндар мен ауыр техникалардың үздіксіз қозғалысының арқасында қазіргі таңда аудан бойынша 1 813 гектар күріш орылып, оның 1 174 гектары толықтай бастырылды. Ең қуаныштысы, жиналған өнімнің сапасы жоғары болып, орташа өнімділік 45,2 центнерге жеткені – диқандардың көктемнен бергі төккен терінің еш кетпегенінің айқын дәлелі. Осы жалпы аудандық көрсеткіштің ішінде Қожакент ауылдық округінің де үлесі өте қомақты. Биылдың өзінде аталған округте 1 540 гектар алқапқа күріш егіліп, жаз бойы тыңғылықты күтіп-бапталды.
Ал осы округтегі еңбеккер ұжымдардың бірі «Арай» шаруа қожалығы 213 гектар алқапқа күріш егіп, бүгінгі күннің өзінде оның 84 гектарын ысырапсыз жинап алды. Бап пен баптаудың, тынымсыз еңбектің арқасында бұл қожалықта орташа өнімділік 48 центнерді құрап, жалпы аудандық орташа көрсеткіштен де асып түсіп, өзгелерге үлгі боларлық нәтиже көрсетіп отыр. Күн райының қолайлы сәтін тиімді пайдаланған ауыл еңбеккерлері әрбір сағатты алтынға балап, егінді өнімді етіп жинап алуға бар күш-жігерін салуда. Маңдай термен келген диқан еңбегі – қашан да ел ырысының бастауы. Егін науқанының ойдағыдай, берекелі өтіп, қамбамыздың сапалы астыққа толуы – бүкіл елдің ырыс-несібесі мен азық-түлік қауіпсіздігінің кепілі болмақ.
