Jaqtime.kz Жаңақорған ауданына қарасты Шалқия кентінде аймақ экономикасының әлеуетін еселеп, өнеркәсіп әлеуетін жаңа белеске көтеретін ауқымды жобаның іргетасы қаланды. Халықаралық ынтымақтастықтың озық үлгісін көрсететін бұл бастама – «Бурабай-Жалғызағаш» тау-кен байыту комбинатының ресми түрде құрылысын бастау салтанатымен айшықталды.
Жобаны жүзеге асыруға Қытайдың ірі өндірістік гиганты «Liaoning Hongda Group» компаниясы тікелей тартылып, өңірге қомақты инвестиция құюды қолға алды. Мемлекет басшысы Қасым-Жомарт Тоқаевтың елімізді жаңа инвестициялық циклге көшіру, заманауи әрі инновациялық өндірістерді іске қосу және өңірлердің шикізаттық емес секторын дамыту жөніндегі тапсырмасы осылайша Сыр бойында нақты нәтижесін бере бастады. Сыр өңірі үшін бұл тек кезекті өндіріс орны емес, тұтас ауданның әлеуметтік-экономикалық келбетін өзгертетін, экономиканы әртараптандыруға жол ашатын тарихи оқиғаға айналмақ.
Жобаның ауқымдылығы мен стратегиялық маңызы оның қаржылық әрі өндірістік көрсеткіштерінен де айқын көрінеді.
Инвестор тарапынан құрылыс жұмыстарына 138 миллиард теңгеден астам қаражат қаралған. Алып комбинат алдағы екі жыл ішінде қарқынды тұрғызылып, 2028 жылы толық қуатына шығып, пайдалануға беріледі деп межеленген. Өндірістік нысан толық іске қосылған шақта жылына 210 мың тонна сапалы қорғасын-мырыш шикізатын өңдеп, 20 тонна таза күміс шығаруды жоспарлап отыр. Ең бастысы, бұл өндірістік серпіліс жергілікті халық үшін 550-ден астам жаңа әрі тұрақты жұмыс орнының ашылуына мүмкіндік береді.
Қазіргі уақытта стратегиялық маңызы бар нысанның инфрақұрылымын дайындау мен техникалық алғышарттарын жасау жұмыстары қарқынды жүріп жатыр. Кен орнының минералдық-шикізат базасын бұдан да ары кеңейту мен нақтылау мақсатында арнайы геологиялық бұрғылау жұмыстары жүргізілуде. Сонымен қатар, ауыр техникалар мен өндірістік көліктердің тоқтаусыз қозғалысын қамтамасыз ететін жаңа өндірістік жолдардың құрылысы басталып, болашақ кешеннің негізгі алаңдары белгіленді. Заманауи комбинатты толыққанды электр қуатымен қамтамасыз ету мақсатында жоба-сметалық құжаттамалар толық әзірленіп, нысанды орталық электр желілеріне қосудың техникалық жоспары бекітілді.
Бұл ірі бастама Сыр өңірінде соңғы жылдары қалыптасқан жүйелі индустриялық дамудың заңды жалғасы болып табылады. Тек Жаңақорған ауданының өзінде соңғы үш жыл ішінде жалпы құны 6,7 миллиард теңгеден асатын 9 инвестициялық жоба сәтті жүзеге асты. Ал алдағы үш жылдық межеде облыс көлемінде өнеркәсіп саласын жаңғыртуға бағытталған 1,9 триллион теңгені құрайтын 48 ірі инвестициялық жобаны іске қосу жоспарланған. Сыр өңірін жаңа индустриялық орталыққа айналдыратын бұл ауқымды жоспарлардың нәтижесінде өңірде 10 мыңнан астам жаңа жұмыс орны құрылып, тұрғындардың әл-ауқаты мен аймақ экономикасының бәсекеге қабілеттілігі арта түспек.
